![]()
Трэба проста рабіць сваю працу. Больш за сто дзён у Беларусі ідуць акцыі пратэсту: на працягу тыдня ў ланцугі салідарнасці, на маршы і мітынгі выходзяць пенсіянеры, жанчыны, медыкі, студэнты, а ў нядзелю — ўсе яны разам. Нягледзячы на жорсткія разгоны і гвалт з боку сілавікоў, беларусы працягваюць настойваць на мірным характары сваіх пратэстаў. «Радыё Рацыя» пагутарыла пра гэта з сустаршынёй Руху салідарнасці «Разам» Аленай Талстой. - На гэтым тыдні было 100 дзён беларускаму пратэсту. Для Вас гэтыя 100 дзён чым сталі? - Як і для кожнага беларуса гэта, канешне, выпрабаванне. Таму што, дзе б мы не знаходзіліся, мы не можам быць па-за гэтымі працэсамі. Гэта і бяссонныя ночы, гэта з першых дзён пасля выбараў сувязь з блізкімі і сябрамі ў Беларусі, гэта калі ты ўвесь час на сувязі з Менскам, калі ты маніторыш каго затрымалі, хто на волі, каму нейкая дапамога патрэбна. Гэта сябры нашага Руху салідарнасці «Разам». - А для краіны чым сталі гэтыя 100 дзён? Для Беларусі – гэта і фармаванне нацыі, і салідарнасць тая, якой не было ніколі раней.