![]()
Каб стаць званаром, віцяблянін кінуў працу тэлеінжынэра. Ігар Турчыновіч працуе званаром больш за дваццаць гадоў. Каб вызваліць час для любімага занятку, ён пакінуў працу тэлеінжынэра на «Віцязі» і ўладкаваўся ў ахову. Яго першы звон важыў каля шасьці кіляграмаў. Цяпер Ігар звоніць у дабравесьнік вагою болей за пяць тонаў. Гэта найвялікшы звон Віцебску, які вісіць на вежы Ўсьпенскага сабору ў гістарычным цэнтры гораду. Разам са званаром карэспандэнты Радыё Свабода падняліся на званіцу сьвятыні. А другой гадзіне мы сустракаемся на пляцоўцы каля Ўсьпенскага сабору. У гэты час тут малалюдна: ранішняя служба ўжо адбылася, вечаровая пачнецца а пятай. Звон павінен прагучаць не раней як за гадзіну перад пачаткам набажэнства. Ва Ўсьпенскім саборы дзьве званіцы. Кожная — па сорак мэтраў увышыню. Бліжэйшую да Кіраўскага моста называюць «менскай» — званы для яе адлівала сталічнае прадпрыемства «Выдатнае ліццё». Менавіта яны штодзень гучалі падчас будоўлі Ўсьпенскага сабору на месцы храма, узарванага ў 1936 годзе.